OLIMJON RAHMONOVОЛИМЖОН РАҲМОНОВ

(1919, Namangan shahri — 9. 01. 1995, Uchqo‘rg‘on) — muallim, rahbar-xodim, 1932 yilda Namangan shahri 2-o‘rta maktabda kashshoflar etakchisi bo‘lib ishlay boshlagan. 1939 yilda shu erda muallimlar bilim yurtini bitirdi. 1940 yildan harbiy xizmatda. 1942 yilda 1-Ukraina frontida yaralanib qaytadi. So‘ng ona shahrida artel boshlig‘i, shahar firqa qo‘mitasida yo‘riqchi bo‘lib ishlagan (1943-46). 1948 yildan boshlab Uchqo‘rg‘on tumanida, 34 yil mobaynida tuman firqa qo‘mitasida bo‘lim mudiri, kotib, ijroqo‘m raisi va muovini lavozimlarida ishlab, tumanning ijtimoiy-iqtisodiy rivojlanishiga, xalqning turmush madaniyatini yuksaltirishda katta xizmatlar qildi. Olimjon Rahmonov tashabbusi bilan tumanda qator o‘quv, madaniy-maishiy binolar, yo‘l, ko‘priklar qurilgan, bog‘lar barpo etilgan. 1982 yildan mehnat faxriysi bo‘lganiga qaramay, 1-o‘rta maktabga rahbarlik qildi. So‘ngra tuman faxriylar kengashiga rais bo‘lib ishladi. Bu davrda u Uchqo‘rg‘on tumani va xalqi tarixini o‘rganib, qimmatli ma’lumotlar yig‘di. Ko‘p yillik samarali mehnatlari uchun «Mehnat Qizil bayroq», «Hurmat belgisi» ordeni, «Jasorati uchun», «Jasorat» kabi o‘nlab jangovar va mehnat medallari, faxriy yorliqlar bilan taqdirlangan. Uchqo‘rg‘on shahri, «Birodarlik» qabristoniga dafn etilgan.