YO‘LDOShALI QO‘LDOShEVЙЎЛДОШАЛИ ҚЎЛДОШЕВ

(1934, Pop tumani, Sang qishlog‘i) — olim-agronom, rahbar xodim. Uychi tumanida (1954-55), Zadaryo tumani «Gulob» davlat xo‘jaligida agronom (1955-59), ishchilar qo‘mitasi raisi (1959-62), bosh statist (1962-63); mehnatni rejalashtirish bo‘yicha muhandis (1963-64), Zadaryo tuman firqa qo‘mitasida yo‘riqchi (1964-68), tuman qishloq xo‘jaligi boshqarmasi boshlig‘i (1968-74), Navoiy nomli (1974-75), «Gigant» (1975-78) jamoa xo‘jaliklari boshqaruvi raisi vazifalarida ishladi. 1978-85 yillarda Uchqo‘rg‘on tumani firqa qo‘mitasining birinchi kotibi. So‘ngra Pop tumani «Pravda» jamoa xo‘jaligi raisi (1985-86), tuman SFK boshlig‘i (1986-91), agrosanoat uyushmasi raisi (1991-92), «Pop» davlat xo‘jaligi (1994 yildan shirkatlar uyushmasi) direktori (1992-94) bo‘lib xizmat qildi. Hozir Pop tumani faxriylar kengashining raisi. Yo‘ldoshali Qo‘ldoshev viloyatda qishloq xo‘jaligini rivojlantirishga katta hissa qo‘shgan etuk mutaxassis, tajribali tashkilotchi sifatida ma’lum. U Uchqo‘rg‘on tumaniga rahbarlik qilgan paytlar Norin daryosi bo‘yidagi choyxona — restoran, shu manzildan Qirg‘iz bozoriga olib boruvchi yo‘l, temir yo‘l usti ko‘prigi, shahar madaniyat saroyi, don mahsulotlari korxonasi, o‘nlab ma’muriy bino, maktab, yog‘ zavodi, suv inshootlari tizimi, klublar, shifo maskanlari, turar-joy binolari, bog‘lar barpo etilgan. Paxtachilik, chorvachilik rivojlangan, tumanda etuk kadrlar tarbiyalash va joyiga qo‘yish masalasiga alohida ahamiyat berilgan. Yo‘ldoshali Qo‘ldoshevning ko‘p yillik mehnatlari uchun Lenin, Mehnat qizil bayroq, «Hurmat belgisi» ordenlari, medallar va faxriy yorliqlar bilan taqdirlangan.